南怡島．秋色

進入南怡島有2個方法，一個係坐船，一個係吊入去。想刺激既，緊係去去比人吊一下啦。

可以去到先買飛，已經係包埋回程船費，38,000KRW, 比來回船飛8,000KRW 貴一大截，值唔值就真係自己決定了。

我玩既時節係11月，秋天，下晝4點左右，感覺係：好快玩完，凍。買完飛, 我等左一個鐘先排到，之後上去聽一輪安全指引之後，上吊，呼~ 

1分鐘都無就到左對面，不過我隔壁線就用左多成廿幾秒先到，唔知係因為體重分別定安全問題唔會比同一時間到岸。一個始睇風景好開心，之後就開始比d 風吹到標眼水，唔係好睇到野了。

入場資料：http://chinese.visitkorea.or.kr/chs/SI/SI_CHG_2_1_1_1.jsp?cid=1235622

入到島入面，係好多人的，我相信無論你幾時去都好多人的。我去到樹葉開始變紅，係周圍都比高大既樹林包圍，感覺其實好好的。不過你周不時會比遊客龍友既舉動打擾一下姐。

相比睇冬季戀曲，我諗雪景應該會比紅葉更好睇。不過基本上，充滿花草樹木既地方，四季都會有不同的好看。基本上注意一下保暖，非常推薦去輕鬆行一下，用腳定去租單車，都會係好既選擇。

如果你仲較埋黃昏時間，係水邊睇住日落真係非常之正。真正既旅遊真樂趣，係要走出市區商場既~

雪氷 - 韓式刨冰

韓國好食的不只是燒肉海鮮，甜品都有好多出色既例子。刨冰呢d 係日台韓都非常流行，今次就去左雪氷叫左個刨冰同多士。

刨冰，我叫既只係普通加左綠荳蓉既，其實如果餓D, 就可以叫個d鋪滿生果之類既系列...

其實我覺得刨冰唔係夏天食，冬天先係一個好時節，不過係韓國既cafe 基本上都有暖氣，其實都無咩冷暖時節分別。

講返個刨冰，size 十足，冷內藏紅荳蓉，鋪面又煉奶又荳蓉，溝埋大啖冰入口，感覺非常良好!

而慳左既胃部空間，就係因為我要留返d 位食埋個多士，一個有外脆內軟，夾住熱辣辣, 軟腍腍麻糬既多士~ 其實我鐘意個多士仲多過個刨冰囉...

去旅行就唔好擔心體重喇，有得食，緊係食左先~

帶定消滯茶包啦!

未去既上網睇圖止下咳: http://sulbing.com/online/

Common Ground - 非常型格的商場

現代既百貨公司、大型商場基本上都係比大型連鎖品牌佔據，真係全世界都一模一樣。如果要去睇下真正當地文化，就只係可能變成景點既古老市場，一係就比較細小既商場，呢D場好多時都只係一堆小店拼合而成，賣d 自己品牌, 手作仔咁。我就一向比較鐘意呢d 。

位於建大的新商場，以貨櫃搭建，內裡都是年輕、休閒style 的衣飾店為主，產品類別都算正正常常啦，環境設計反而先係亮點。商場入面仲有個DJ 櫃位有人打碟。商場外有d 咩漢堡熱狗食扮晒鬼佬，同埋有出名既彩虹蛋糕 (不過其實味道只係普通的海綿蛋糕...)。

非常建議抽時間去逛的地方。香港都好似會抄個款做一個水貨城。不過有機會緊係睇下正版個個啦~

交通：建大6號出口直行就是了。

地址：首爾市廣津區紫陽洞17-1 광진구 자양동17-1

網址：common-ground.co.kr

營業時間：1100-2200

韓國 wifi egg 用後感 - LG G+

去韓國旅行要租wifi 蛋是常識吧。由於我怕係香港租的去到用唔到就麻煩，所以我係鐘意去到先租，即租即試，有咩事即刻有人搞。用LG G+ 因為一直都覺得佢收得幾好, 件野又細，不過佢唔係最平，貴極爭少少，唔爭在。

實驗證明，出街用係半日，所以自己要拎多舊電去，香港買舊電唔係難嘛。買舊10,000mAh 以上既，叉電話 + wifi 蛋夠晒用。

我釜山玩完，火車去首爾，過程完全無問題，仲可以當暖蛋用。

租既方法 (釜山金海機場)，出閘行出去, 一排3間，睇岩行埋佢，有晒價目表，手指指你要既，比passport 登記，信用卡，試機，走得。

還機就係仁川機場，流程係：排隊, 交機, 簽咭，走人。

呢篇文真係純投LG 一票。完全唔係技術文，本身件事無技術可言。想格價既，去到先睇先update。

初遊奈良

奈良好多人都係去睇鹿，對於我呢d 關西初哥，當然都要跟下大隊，不過去到之後，最吸引我反而係個種休閒行公園既感覺。實在太舒服喇。

由大阪去奈良好方便，近鐵既車站係比JR 近d 主要景點，坐邊間真係睇自己。興福寺、東大寺、春日神社個d，跟路牌走難度唔大。去到奈良國立博物館對面有個遊客中心，免費廁所水機 wifi，可以做一個中途加水站。

不過，我非常重點推介奈良公園近浮見堂既位置。曬太陽野餐一流。

一日，都只係夠行到呢d 範圍，其他地方，可能要下次再發掘了。

浮見堂既位置

係奈良只係食左一餐，OK 既，不過不失 (びっくりうどん 三好野)。

京都遊記 (八)

伏見稻荷大社，有過千鳥居既神社。去之前其實我唔係好明點解咁多。去左之後既感覺係—保護費。見到大個d 鳥居刻晒名呀，日子呀，之後周圍貼唔同尺寸鳥居幾錢，我就覺得，係隻狐狸收保護費。去既時候，都抱住睇下另一個出名既神社，不過行到一半之後，就發覺出事，其實係一個行山節目黎的。如果你係想參拜下，問題不大，當你跟住行去睇千鳥居，沿山路一步一步玩自拍既時候，你就不知不覺開始左一個行山旅程。一個鐘。上到山頂。不停行樓梯。仲要係時不時微雨既情況之下，我居然整左個行山節目出黎。係，我係條氣唔順，無理由中途放棄，我都唔係一個半途而廢既人，不過，硬頸係有代價的，行到上去，上氣唔接下氣，沿途好多小型的山寺同茶居。如果你可以放慢心情，慢慢慢慢地行，都可能好舒服既。始終大個樹林包圍，風都涼爽d (亦可能因為個日有雨)。總之今次就伏見行山。無喇喇幫手消耗我大量卡路里。

行完伏見，真係見餓。係最後一日京都行程，下晝我係計劃去行下街，睇下有咩買。所以我就去返京都車站喇。黎左幾日，今次先係第一次見下京都車站。好靚既建築物。日本建築呢，真係好有水準。不過都係要去醫肚先。去左旅遊書必講既拉麵小路搵野食，全部有晒圖，自助買飛等位，間間我都唔識。咁呢個時候，緊係搵間有人排隊嫁啦，仲要係本地人排多既。最後就排左間德島乜乜乜拉麵，拉麵加餃子套餐。好好好食，日本煎餃子真係好岩我口味。

食飽飽之後就開始去睇下有咩買。其實京都車站已經有個大百貨公司，不過我對入面既野無咩興趣，所以係去左電器商場睇電子產品。マルチメディア京都 (http://www.yodobashi.com/ec/store/0083/index.html) 日本電器，真係唔買都睇下。就咁好唔覺都行左幾個鐘，就返河原町再行下Tokyu Hands ，第一次京都之旅就係咁完左喇。

京都遊記 (七)

祗園其實夜晚靚過日頭，行左入去，真係好有古代風情，不過其實範圍唔算好大，而且都係飲飲食食多，最後去左十二段家，食個尾門午餐(因為人地係有午休的，完左lunch 時間就休息等晚飯先再開)。食個天婦羅炸蝦飯，好好食，好肥美既蝦。不過，入面環境仲正，好舊式食堂feel，真係日劇個隻。

食飽之下就開始下一站。既然係巴士之旅，就遠d 都無所謂。所以就決定去 — 哲學之道。行返出五条通近橋位個巴士站搵車上。巴士站又係有晒指示，睇下邊班車就到就上得。哲學之道其實都真係社區入邊既一條路，一條水渠，旁邊種樹，鋪條石板路。加個故仔，景點就成形了。除左個故仔，其他真係有心就做到，唔係咩大工程，可以話都係普通美化下社區咁。綠化社區係香港，唉，講出黎都丟架。哲學之道真係可以輕輕鬆鬆咁行，望下四周屋仔，小店。真係心情輕鬆舒暢。行行下，就會到銀閣寺。又可以入去參觀下喇。

銀閣去入面又係有日式亭園設計，係我今之行程最鐘意睇既野。慢慢行，享受下比樹木水池包圍既感受。係入面迆到夠，離開都已經開始日落。為左唔會黑晒天搵路，所以回程去搵巴士坐了。回程又跟哲學之道行，因為真係好舒服，另一邊盡頭係若王子神社，無咩特別。之下落山搵巴士站。

日落之後就覺得凍左，仲又黎落雨，好彩已經到巴士站，有瓦遮頭。等巴士出返河原町，今日行左咁耐，搵個好坐d野食返餐。出返去，大堆百貨公司中我入左高島屋入面搵食。去得旅行，緊係要試下新野，所以就去食鰻魚茶漬飯。非常有趣好食。食飽無無聊聊四圍逛下又一day。

拉麵小路, 德島ラーメン東大拉麵

係京都車站上面既拉麵小路, 8間亂點一間試，德島ラーメン東大拉麵 (http://www.kyoto-ramen-koji.com/shop07.html)。

德島乜乜乜真係唔多識，不過好好食，湯底係屬於濃個隻，生蛋免費，一隻放麵，一隻加豉油撈飯。我仲見有人間開只落蛋黃落麵。真係連湯都好好飲。

不過再講一次，係濃湯底，唔喜既，去另一間試。

十二段家 - 京都花見小路店

十二段家, 花見小路店。 (http://www2.ocn.ne.jp/~junidany/index.html)

係咪最好食就未必，不過風味等如你去傳統香港茶記，食環境多過食食物。都值得一試。

京都遊記 (六)

睇返日本天文台，嵐山係下午係有預告會落雨，估唔到京都唔同地區都已經可以有唔同天氣。睇叔返第日就全京都都可能有雨，而且溫度仲會趺。死火，我得件風褸，都唔知頂唔頂得順。睇返想去既景點，下一個就係清水寺、祗園、哲學之道幾個可以一日行晒。單車定坐車就等聽朝出街咩天氣先再算。

一早起個靚身，梳洗完之後出街望下個天，死火，一大舊雲，天陰陰。不過都先醫下個肚先，我唔係D胞肚食早餐既人，所以係餓的。Holly's coffee (http://www.hollys-corp.jp/) 係韓國同大陸都見過，應該都係大既連鎖集團了。呢朝食左個包同飲杯熱朱古力，食暖左個身再行出去睇下個天咩景。都係灰灰地，不過又無落雨，咁我究竟搏佢會出太陽定估佢會落雨好呢，好天就踩車，落雨就坐車。行左個圈思想掙扎完，最後都係唔搏，決定巴士一日遊好了。

坐巴士，比錢又得，嘟卡又得，買1日pass又得。如果你想慳到盡，買1日pass,仲要係街邊專賣車飛既檔買。可以平10yen。得左。

去清水寺既巴士永遠多人，跟大圍你基本唔衰得去邊，當然你好好係巴士站睇定邊到落車(應該係清水道)。漢字既野，睇得明既。巴士上會有廣播，唔識聽都識睇字掛。落車之後，就要行條斜路(清水坂)上山喇。沿途大把手信，小食，早知等黎到先掃街。不過咁吸引，都忍唔住食返個包先。一條直路上到去，就會見好多神棍，自拍神棍插出黎，一係你有備而來一齊耍棍，唔係既話，就要左穿右插搵個影相位了。清水寺景觀真係一流，可惜又有維修，要見返全貌，都唔知幾年後了。影一大輪相之後，就落返去三年坂、二年坂落山，治途又係食野加精品，又有hello kitty cafe(はろうきてぃ茶寮)、宮崎駿 (どんぐりの森)，真係唔買都有排睇。直行落去又會路過高台寺，圓山公園。係圓山公園休息左陣，就再轉落去八坂神社。之後就再行去祗園去搵飯食了。

茶漬鰻魚飯 - うなぎ德

茶漬係香港比較少見，就算港式湯飯都少見左啦。今次係河原町高島屋去左間叫 うなぎ德(http://www.unagiya.co.jp/)既鰻魚店食左個鰻魚茶漬飯。係得高島屋開檔，應該都係中上野掛，入到去，其實鋪面唔係好大，店員就帶左我去中間大枱，枱中間整左個迷你日式庭園，十足日本風味。

食茶漬鰻魚飯分三個步驟：

1. 先食個原味先，咩都唔使落

2. 加D 蔥、wasabi 又食一碗

3. 最後，就係加蔥、wasabi、湯又食一碗

4. 之後剩返個d，就自己決定啦

味道方面呢，會比食蒲燒既食法淡口，條魚都幾肥美幾多油，但係食完一d 都無油膩既感覺，真係幾好食。

先食個原味，咩都唔使落

加蔥、wasabi 

蔥、wasabi、湯

京都遊記 (五)

穿過竹林，穿過一大堆店舖，就會見到渡月橋，有得條橋，緊係有條河要過啦。一見條河，真係嘩嘩聲。靚到呢。買個便當或者燒墨魚丸咩都好，去河邊坐低食下野，吹下風真係超享受。上游仲有得玩船仔，不過一條友就免了。享受完涼風之後就準備回程，一路單車路程都非常順利，咁回程就諗住唔跟足地圖亂兜下睇下有無咩新發現喇，點知好衰唔衰開始落雨，仲要越落越大，行人路又窄，經常穿插行人路同馬路。當地人就單手擔遮，我由於技術不精，唔得單手踩單。結果眼鏡超矇超多水珠，地圖開始濕晒，電話又唔得成日拎住睇，又怕遲到還車，卒之係段下斜路段炒左鑊。非常柒咁爬返起身，好彩都係損左d, 日本d路真係鋪得好。唯有行去7仔買支水出路邊沖下傷口先。好好睇返地圖就再出發。一個人既時候，有時無得等人救你，唔好預有人問候你，而且仲要繼續解決你面對既問題。迷路好，受傷好，只有你自己去解決，真係會驚，不過你知道無人幫到你既時候，小宇宙就會爆發出黎，你無時間驚，無時間喊，經歷得幾次，真係會練成強心臟。雖然狼狽，不過我仍然可以6點幾準時還車，不過就成身濕晒，所以決定返酒店沖個涼定下驚。

可能還完車，又返到酒店附近，個人輕鬆晒突然覺得好餓，途經錦市場カリカリ博士食左個墨魚丸(http://tabelog.com/kyoto/A2601/A260201/26007042/)。之後返酒店沖完個沖，捐返入個膠囊時，成個人散晒。休息左陣就出返去食夜晚個餐，行幾個圈都唔知食乜好，卒之係去左一間叫魚心既壽司店(http://www.ajibil.com/uoshin/)。去左間壽司店之後，店員一好始以為我係日本人，勁講一輪先發現我九唔搭八，即時黑左塊面轉頭拎左份英文menu我。因為我坐吧枱，壽司師傅直接等我order,因為佢已經知我係外國人，就好有耐性等我order喇，生野我真係麻麻，最後全部係熟野。師傅睇住我食完一碟先整另一碟比我，淡味到濃味，呢d細心，香港真係得d貴野先有機見呢d服務了。食飽之後就返去酒店，查返下天氣預測，度下第二日行程了。

京都遊記 (四)

入到出嵐山範圍已經開始多人，又有人力車行，所以一入竹林小徑只有推車行了。沿途會見好多和服少女同遊客穿梭。景其實好好的，不過當太多人，就反而打個折扣了。野宮神社就係竹林入面，其實好細的，一眼見晒。不過細還細，都奉祀左好見神明，所以都幾多人去求姻緣、生仔同學業。

http://www.nonomiya.com/

中途會行過一條鐵路，嵯峨野小火車(http://www.sagano-kanko.co.jp/)就係會經過呢度喇，不過我今次無打算坐。穿過竹林，就向渡月橋出發喇。