初遊奈良

奈良好多人都係去睇鹿，對於我呢d 關西初哥，當然都要跟下大隊，不過去到之後，最吸引我反而係個種休閒行公園既感覺。實在太舒服喇。

由大阪去奈良好方便，近鐵既車站係比JR 近d 主要景點，坐邊間真係睇自己。興福寺、東大寺、春日神社個d，跟路牌走難度唔大。去到奈良國立博物館對面有個遊客中心，免費廁所水機 wifi，可以做一個中途加水站。

不過，我非常重點推介奈良公園近浮見堂既位置。曬太陽野餐一流。

一日，都只係夠行到呢d 範圍，其他地方，可能要下次再發掘了。

浮見堂既位置

係奈良只係食左一餐，OK 既，不過不失 (びっくりうどん 三好野)。

京都遊記 (八)

伏見稻荷大社，有過千鳥居既神社。去之前其實我唔係好明點解咁多。去左之後既感覺係—保護費。見到大個d 鳥居刻晒名呀，日子呀，之後周圍貼唔同尺寸鳥居幾錢，我就覺得，係隻狐狸收保護費。去既時候，都抱住睇下另一個出名既神社，不過行到一半之後，就發覺出事，其實係一個行山節目黎的。如果你係想參拜下，問題不大，當你跟住行去睇千鳥居，沿山路一步一步玩自拍既時候，你就不知不覺開始左一個行山旅程。一個鐘。上到山頂。不停行樓梯。仲要係時不時微雨既情況之下，我居然整左個行山節目出黎。係，我係條氣唔順，無理由中途放棄，我都唔係一個半途而廢既人，不過，硬頸係有代價的，行到上去，上氣唔接下氣，沿途好多小型的山寺同茶居。如果你可以放慢心情，慢慢慢慢地行，都可能好舒服既。始終大個樹林包圍，風都涼爽d (亦可能因為個日有雨)。總之今次就伏見行山。無喇喇幫手消耗我大量卡路里。

行完伏見，真係見餓。係最後一日京都行程，下晝我係計劃去行下街，睇下有咩買。所以我就去返京都車站喇。黎左幾日，今次先係第一次見下京都車站。好靚既建築物。日本建築呢，真係好有水準。不過都係要去醫肚先。去左旅遊書必講既拉麵小路搵野食，全部有晒圖，自助買飛等位，間間我都唔識。咁呢個時候，緊係搵間有人排隊嫁啦，仲要係本地人排多既。最後就排左間德島乜乜乜拉麵，拉麵加餃子套餐。好好好食，日本煎餃子真係好岩我口味。

食飽飽之後就開始去睇下有咩買。其實京都車站已經有個大百貨公司，不過我對入面既野無咩興趣，所以係去左電器商場睇電子產品。マルチメディア京都 (http://www.yodobashi.com/ec/store/0083/index.html) 日本電器，真係唔買都睇下。就咁好唔覺都行左幾個鐘，就返河原町再行下Tokyu Hands ，第一次京都之旅就係咁完左喇。

京都遊記 (七)

祗園其實夜晚靚過日頭，行左入去，真係好有古代風情，不過其實範圍唔算好大，而且都係飲飲食食多，最後去左十二段家，食個尾門午餐(因為人地係有午休的，完左lunch 時間就休息等晚飯先再開)。食個天婦羅炸蝦飯，好好食，好肥美既蝦。不過，入面環境仲正，好舊式食堂feel，真係日劇個隻。

食飽之下就開始下一站。既然係巴士之旅，就遠d 都無所謂。所以就決定去 — 哲學之道。行返出五条通近橋位個巴士站搵車上。巴士站又係有晒指示，睇下邊班車就到就上得。哲學之道其實都真係社區入邊既一條路，一條水渠，旁邊種樹，鋪條石板路。加個故仔，景點就成形了。除左個故仔，其他真係有心就做到，唔係咩大工程，可以話都係普通美化下社區咁。綠化社區係香港，唉，講出黎都丟架。哲學之道真係可以輕輕鬆鬆咁行，望下四周屋仔，小店。真係心情輕鬆舒暢。行行下，就會到銀閣寺。又可以入去參觀下喇。

銀閣去入面又係有日式亭園設計，係我今之行程最鐘意睇既野。慢慢行，享受下比樹木水池包圍既感受。係入面迆到夠，離開都已經開始日落。為左唔會黑晒天搵路，所以回程去搵巴士坐了。回程又跟哲學之道行，因為真係好舒服，另一邊盡頭係若王子神社，無咩特別。之下落山搵巴士站。

日落之後就覺得凍左，仲又黎落雨，好彩已經到巴士站，有瓦遮頭。等巴士出返河原町，今日行左咁耐，搵個好坐d野食返餐。出返去，大堆百貨公司中我入左高島屋入面搵食。去得旅行，緊係要試下新野，所以就去食鰻魚茶漬飯。非常有趣好食。食飽無無聊聊四圍逛下又一day。

拉麵小路, 德島ラーメン東大拉麵

係京都車站上面既拉麵小路, 8間亂點一間試，德島ラーメン東大拉麵 (http://www.kyoto-ramen-koji.com/shop07.html)。

德島乜乜乜真係唔多識，不過好好食，湯底係屬於濃個隻，生蛋免費，一隻放麵，一隻加豉油撈飯。我仲見有人間開只落蛋黃落麵。真係連湯都好好飲。

不過再講一次，係濃湯底，唔喜既，去另一間試。

十二段家 - 京都花見小路店

十二段家, 花見小路店。 (http://www2.ocn.ne.jp/~junidany/index.html)

係咪最好食就未必，不過風味等如你去傳統香港茶記，食環境多過食食物。都值得一試。

京都遊記 (六)

睇返日本天文台，嵐山係下午係有預告會落雨，估唔到京都唔同地區都已經可以有唔同天氣。睇叔返第日就全京都都可能有雨，而且溫度仲會趺。死火，我得件風褸，都唔知頂唔頂得順。睇返想去既景點，下一個就係清水寺、祗園、哲學之道幾個可以一日行晒。單車定坐車就等聽朝出街咩天氣先再算。

一早起個靚身，梳洗完之後出街望下個天，死火，一大舊雲，天陰陰。不過都先醫下個肚先，我唔係D胞肚食早餐既人，所以係餓的。Holly's coffee (http://www.hollys-corp.jp/) 係韓國同大陸都見過，應該都係大既連鎖集團了。呢朝食左個包同飲杯熱朱古力，食暖左個身再行出去睇下個天咩景。都係灰灰地，不過又無落雨，咁我究竟搏佢會出太陽定估佢會落雨好呢，好天就踩車，落雨就坐車。行左個圈思想掙扎完，最後都係唔搏，決定巴士一日遊好了。

坐巴士，比錢又得，嘟卡又得，買1日pass又得。如果你想慳到盡，買1日pass,仲要係街邊專賣車飛既檔買。可以平10yen。得左。

去清水寺既巴士永遠多人，跟大圍你基本唔衰得去邊，當然你好好係巴士站睇定邊到落車(應該係清水道)。漢字既野，睇得明既。巴士上會有廣播，唔識聽都識睇字掛。落車之後，就要行條斜路(清水坂)上山喇。沿途大把手信，小食，早知等黎到先掃街。不過咁吸引，都忍唔住食返個包先。一條直路上到去，就會見好多神棍，自拍神棍插出黎，一係你有備而來一齊耍棍，唔係既話，就要左穿右插搵個影相位了。清水寺景觀真係一流，可惜又有維修，要見返全貌，都唔知幾年後了。影一大輪相之後，就落返去三年坂、二年坂落山，治途又係食野加精品，又有hello kitty cafe(はろうきてぃ茶寮)、宮崎駿 (どんぐりの森)，真係唔買都有排睇。直行落去又會路過高台寺，圓山公園。係圓山公園休息左陣，就再轉落去八坂神社。之後就再行去祗園去搵飯食了。

茶漬鰻魚飯 - うなぎ德

茶漬係香港比較少見，就算港式湯飯都少見左啦。今次係河原町高島屋去左間叫 うなぎ德(http://www.unagiya.co.jp/)既鰻魚店食左個鰻魚茶漬飯。係得高島屋開檔，應該都係中上野掛，入到去，其實鋪面唔係好大，店員就帶左我去中間大枱，枱中間整左個迷你日式庭園，十足日本風味。

食茶漬鰻魚飯分三個步驟：

1. 先食個原味先，咩都唔使落

2. 加D 蔥、wasabi 又食一碗

3. 最後，就係加蔥、wasabi、湯又食一碗

4. 之後剩返個d，就自己決定啦

味道方面呢，會比食蒲燒既食法淡口，條魚都幾肥美幾多油，但係食完一d 都無油膩既感覺，真係幾好食。

先食個原味，咩都唔使落

加蔥、wasabi 

蔥、wasabi、湯

京都遊記 (五)

穿過竹林，穿過一大堆店舖，就會見到渡月橋，有得條橋，緊係有條河要過啦。一見條河，真係嘩嘩聲。靚到呢。買個便當或者燒墨魚丸咩都好，去河邊坐低食下野，吹下風真係超享受。上游仲有得玩船仔，不過一條友就免了。享受完涼風之後就準備回程，一路單車路程都非常順利，咁回程就諗住唔跟足地圖亂兜下睇下有無咩新發現喇，點知好衰唔衰開始落雨，仲要越落越大，行人路又窄，經常穿插行人路同馬路。當地人就單手擔遮，我由於技術不精，唔得單手踩單。結果眼鏡超矇超多水珠，地圖開始濕晒，電話又唔得成日拎住睇，又怕遲到還車，卒之係段下斜路段炒左鑊。非常柒咁爬返起身，好彩都係損左d, 日本d路真係鋪得好。唯有行去7仔買支水出路邊沖下傷口先。好好睇返地圖就再出發。一個人既時候，有時無得等人救你，唔好預有人問候你，而且仲要繼續解決你面對既問題。迷路好，受傷好，只有你自己去解決，真係會驚，不過你知道無人幫到你既時候，小宇宙就會爆發出黎，你無時間驚，無時間喊，經歷得幾次，真係會練成強心臟。雖然狼狽，不過我仍然可以6點幾準時還車，不過就成身濕晒，所以決定返酒店沖個涼定下驚。

可能還完車，又返到酒店附近，個人輕鬆晒突然覺得好餓，途經錦市場カリカリ博士食左個墨魚丸(http://tabelog.com/kyoto/A2601/A260201/26007042/)。之後返酒店沖完個沖，捐返入個膠囊時，成個人散晒。休息左陣就出返去食夜晚個餐，行幾個圈都唔知食乜好，卒之係去左一間叫魚心既壽司店(http://www.ajibil.com/uoshin/)。去左間壽司店之後，店員一好始以為我係日本人，勁講一輪先發現我九唔搭八，即時黑左塊面轉頭拎左份英文menu我。因為我坐吧枱，壽司師傅直接等我order,因為佢已經知我係外國人，就好有耐性等我order喇，生野我真係麻麻，最後全部係熟野。師傅睇住我食完一碟先整另一碟比我，淡味到濃味，呢d細心，香港真係得d貴野先有機見呢d服務了。食飽之後就返去酒店，查返下天氣預測，度下第二日行程了。

京都遊記 (四)

入到出嵐山範圍已經開始多人，又有人力車行，所以一入竹林小徑只有推車行了。沿途會見好多和服少女同遊客穿梭。景其實好好的，不過當太多人，就反而打個折扣了。野宮神社就係竹林入面，其實好細的，一眼見晒。不過細還細，都奉祀左好見神明，所以都幾多人去求姻緣、生仔同學業。

http://www.nonomiya.com/

中途會行過一條鐵路，嵯峨野小火車(http://www.sagano-kanko.co.jp/)就係會經過呢度喇，不過我今次無打算坐。穿過竹林，就向渡月橋出發喇。

京都遊記 (三)

離開左北野滿天宮就繼續北上平野神社，之後再上金閣寺，不過我係過門之不入。因為怕回程唔夠時間。不過上黎金閣寺開始山路多，勞動既開始。之後沿きぬかけの路經過堂本印象美術館、立命館大學、仁和寺、広沢池、池の茶屋，就到我下個重要景點：大覺寺。呢個都係租單車時個位員工推介既景點。

http://www.daikakuji.or.jp/

入屋除鞋，用腳去感受下日式建築木地板既感覺真係好好。日式既花園設計，真係好靚，加上參觀既人唔係好多，你可以慢慢行下坐下去享受咩係自然氣息。一沙一石既放置大小，真係好和式風味呀，就係呢一站，之後我更多去睇D 有日式園林設計既寺院。入面仲有個湖叫大沢池，因為太舒服，所以都hea 左幾耐先肯走。

之後就下山路段，劈住去竹木小徑同野宮神社喇。

北野天滿宮

北野天滿宮出名既係求學業同梅花。對呢兩樣野有興趣既，就一定要去睇下喇。行下影下花，好快會用左你個幾鐘頭。寺入面有隻鈉銅牛，摸下會醒D喎，迫到埋去就摸下啦。我就摸唔到喇 。

http://kitanotenmangu.or.jp/

京都 - 晴明神社

有無睇過《陰陽師》先？有無睇過錦戶亮 《萬事占卜處：歡迎來到陰陽屋》 ？ 如果聽過邊個安倍晴明，就點都到此一方遊下喇，地方唔係好大，幾個字半個鐘都夠喇。

http://www.seimeijinja.jp/

京都遊記 (二)

第二日起身就去 inoda's coffee 食個靚早餐先。點左歐式西餐一份，係好食既，一去到要同日本本地人一齊排隊就知唔衰得去邊。可惜仍然係手語溝通。

日本食店我覺得有樣好，黎齊就比埋張單你，之後你自己去收銀埋單。唔使講太多野。點野食時你一係用餐牌指指點點，一係買飛，再唔係影左門口d 野食相比佢睇。唔怕落唔到單。純文字就搏下啦，斷估無痛苦。

食飽之後就去左錦北 (コープイン京都) 呢間酒店，KCTP 係大堂開左張摺枱租單車，因為d 車有大量好評，所以都幾出名的。個日又神運遇到係香港人店員，即時廣東話請教，話個日天氣最好，可以去遠D，所以就決定去嵐山走返轉。

店員幫我畫晒path，教晒路，又租埋有 8段波既單車，點知對於我呢d 9年唔掂一單車次既人，出事係正常既，就係去到回程突然大雨，趕路濕晒之餘仲炒左次，好彩都只係擦損，不過之後兩日天氣都唔穩定，又凍左，卒之單車左一日就變左巴士遊。

講返個日先，check 好車之後就出發去北野天滿宮(http://kitanotenmangu.or.jp/)，行堀川通中途經過晴明神社(http://www.seimeijinja.jp/)，一個平安時代出名既日本陰陽師安倍晴明，錦戶亮都拍過有關題材電視劇 (萬事占卜處 歡迎來到陰陽屋)，有無印象先？ 寺廟唔係好大，行個圈幾個字就走得。之後繼續行到今出川通西行就會到北野天滿宮。地方好大下，人又多，係出面泊好架車就可以入去參觀。可惜個日唔係花滿開既日子，唔係應該仲靚。

京都遊記 (一)

係2015年既2月，因為要清假，所以好急咁整左次日本關西之旅，因為響往左舊式日本既畫面都好耐喇，的起心肝去一次。

首先係機票問題，因為都係窮遊系列，所以都係查廉航為主。正常航空公司特價飛有睇，唔中囉。最後選左捷星，加埋來回行李上到20kg，2千4左右。酒店就決定分2個地點，一半係京都，一半係大阪。京都會住先，民宿同膠囊之間，決定訓膠囊。大阪就住返好D ，租左間公寓式酒店。

第一日到關西機場已經夜晚六、七點，仲要排超長龍等過關，中途有個識普通話既日本伯伯幫手睇下你個入境紙有無填錯。超友善。出左關就要去搞搞KIX 個會員卡 (http://www.kansai-airport.or.jp/kc/)，一早上網填好，去拎卡就得，雖然最後無用過。跟住就去JR information 買 pass。haruka X icoca ，即係機鐵 + 八達通，方便之選。有d 有更好計劃既人就會買幾day 既關西 pass + icoca，一樣好。可惜我唔係咁有計劃既人。

個幾鐘車去到京都，差唔多十點，因為要慳用張data 卡 (我去9日，張卡用7日) 所以係無data 既情況去搵酒店，沿途不停搵免費wifi 睇 google map。迷幾次路就搵到。搵左間叫9小時既膠囊酒店，外觀新潮，用落乾淨。訓膠囊有個問題，就係隔音麻麻，如果同區有勁鼻鼾聲，就真係無辦法了。而今次我更不幸，有晚同區有幾條友唔生性，係睡眠區勁吹水，完全唔理其他人感受。不過個床位都叫舒服，中央空調，溫度無得自己控制。行李位係無的，只可以留係樓下大堂，不過我都見人拎埋放係床位前，不過我覺得仲危險。

放低左行李問酒店姐姐邊度仲有飯食，佢拎左張地圖指指點點之後我就出去搵野食了。不過因為太餓，當我見到間松屋之後就即時衝左入去。毒撚食牛肉飯飯堂，襯晒。食飽之後就返去沖涼訓，準備第日正式開波。

訓之前，死唔蝕底係0000開通張富士卡，點知一個鐘之後send 左 msg 黎，你今日既使用量。小你，唔係計當地時間既咩，做乜春野？就係咁，我就蝕左1日了，即係我最後2個係無data 用.....頂你。佢係計左大陸時間，日本係+1，下次記住了。

港女，大陸妹

一個人去旅行，自然會留意多左身邊既事，有次日本來回機程，分別坐係香港情侶同大陸情侶隔離。感覺大不同。

個次坐jetstar 去關西，3、 4個鐘，對一個窮人黎講都係快靚正就最好。坐既位置空間唔差，唔使你屈足幾個鐘先去到目的地，開得都算穩，起碼唔似係戰機機師。

講返主題。去程，遇香港情侶，一上機，港女就話口渴。咁條仔睇下個menu 就話，廉航水都要錢喎，條女有D 唔順，就話等我陣間老難下，無理由水都唔比。之後比條仔說服左唔出聲，想叫空姐買水算。點知空姐話要起飛左先。咁無法啦，就等等等到開始賣野，阿男友問下條女係咪想要水，條女就話算啦，無謂嘥錢。之後就各自訓到落機。

回程既時候，就遇到大陸情侶，一上機，就見條仔又手袋，又叉電。條女就係咁唔知微博定咩。空姐叫男友多次放個手袋落地，佢就次次扮放之後又拎返上黎，死都唔比個袋掂到地。每次扮放落地，條女就啤一次。到起飛時要熄機，條女一熄機就放部機係條仔隻腳，即時訓返陣。條仔就好乖即時拎去叉電。到開餐時間，條女叫條仔一氣點左2個包、4杯薯條、1包童星、3支野飲，除左1個包同一支野飲係條仔，其餘都係比佢自己，條仔同空姐order 完，就自動自覺比埋錢。之後好一段時間條女表演勁食。到食飽飽，就係自拍時間，箍實條仔係咁影，條仔緊係冧晒啦。有心口訓喎，呢d 可能係豪既回報。到落機拎機上面d 行李，原來佢地有成6、7袋野仲有個飯煲。條仔好辛苦拎野d 野落黎之後，條女只係施施然幫手拎左一兵袋最細既野。

雖然可以話單一例子，不過港女大陸妹，真係大不同。

東寺夜櫻

日本有唔少寺廟都會有夜櫻環節，如果有打算睇夜櫻，就要好好計劃，無謂一個地方比兩次錢。無錯，夜櫻入場費係另計的。

可惜我去個日花未開得晒，享受唔到櫻花海既震撼。

晚上既巴士係好疏落的，如果用巴士做交通就要係站先好好睇下時間表。日本巴士都係好準時的。放心。

東寺

京都 - INODA COFFEE

日本早餐類型唔算多，飯，包，西式set。

Indoa coffee 係京都出名餐廳之一，慕名而去食返個早餐，係好食的，不過又未到好驚喜個隻。店員仍然係用日文努力同你溝通個隻。好多本地人都去排隊，身邊少左d 普通話，感覺真係好d...

但我仍然覺得香港既老茶更好...

inoda-coffee 官網

大阪景點地圖

我對大阪既印象係....買野。要shopping環球片場個d，OK，岩你。

我自己mark 想去既景點，最終係無去齊的....

日本上網

一個人去旅行，用wifi 蛋係無乜用的，你又唔係要同時n 部機上網，一電話一ipad share wifi 咪得囉。富士卡係鴨記排檔賣120，yahoo 拍賣都係。肯花多幾廿蚊可以去日本買so-net卡。

我用富士卡係大阪、京都、奈良、姬路、神戶都無問題。

不過小心佢0000 開始計一日，仲要係大陸時間 ! 日本時間係+1 的，即係要日本時間0100點後先好開卡，唔係就少左日，我就係中左伏...

日本都有D搜免費wifi apps，不過關西唔多用到，希望之後會發展好d 啦。
http://www.ntt-bp.net/jcfw/tw.html

7仔, Family Mart個d 便利店都有wifi 可以用，一係就d cafe, 百貨公司之類了。

京都行程路線建議/地圖

分享一下我的京都路線：

路線 1 -

晴明神社 > 北野天滿宮 > 平野新社 > 金閣寺 > 龍安寺 > 大覺寺 > 嵐山 > 野宮神社 > 渡月橋 > 嵐山公園 > 回程


路線 2 -

清水寺 > 祗園 > 知恩院 > 平安神宮 > 哲學之道 > 銀閣寺 > 回程，沿鴨川行，到四条通/ 祗園附近晚餐

大覺寺

如果你有計劃參觀金閣寺，嵐山，就可以將大覺寺包埋入去。日式庭院設計加一個小湖，絕對值回票價。

旧嵯峨御所 大本山 大覚寺